“Зээлийн мэдээллийн тухай” хуулийн 19 дүгээр зүйлийн 19.1-т зааснаар, иргэн болон аж ахуйн нэгжийн үнэн зөв зээл, төлбөрийн мэдээллийг зээлийн мэдээллийн сангаас устгах боломжгүй бөгөөд эдгээр мэдээлэл 10 жилийн хугацаанд хадгалагддаг.

Гэхдээ хуулийн 22 дугаар зүйлийн 22.1.2-т зааснаар, хэрэв таны мэдээлэл буруу, бүрэн бус эсвэл хуучирсан гэж үзвэл, та тухайн мэдээллийг зээлийн мэдээллийн санд илгээсэн байгууллагад хандан мэдээллээ залруулах, шинэчлэхийг шаардах эрхтэй.

Иймээс сөрөг мэдээллийг “устгах” боломжгүй ч, буруу бүртгэгдсэн мэдээллийг засуулах боломж нээлттэй байдаг.

“Зээлийн мэдээллийн тухай” хуулийн 19 дүгээр зүйлийн 19.1-д заасны дагуу:

• Иргэн, аж ахуйн нэгжийн бүрэн төлөгдсөн зээл болон төлбөрийн мэдээлэл нь зээлийн мэдээллийн санд 10 жилийн хугацаанд хадгалагдана.

• Харин төлөгдөж дуусаагүй зээл, төлбөрийн мэдээлэл нь тухайн зээл хаагдах хүртэл хугацаагүйгээр хадгалагдана.

Энэ журам нь зээлийн байгууллагуудын хооронд үнэн зөв, найдвартай мэдээлэл солилцох нөхцөлийг бүрдүүлэх зорилготой юм.

“Зээлийн мэдээллийн тухай” хуулийн 4 дүгээр зүйлийн 4.1.12-д зааснаар,
зээлийн мэдээллийн лавлагаа нь зээлийн мэдээллийн санд хадгалагдаж буй иргэн, аж ахуйн нэгжийн зээл болон төлбөрийн түүхийн мэдээллийг цахим эсвэл бичгийн хэлбэрээр хэрэглэгчид өгөх албан ёсны баримт юм.

Энэхүү лавлагаанд таны:

• Зээлийн тоо, төрөл, анхны дүн

• Төлөлтийн түүх, хугацаа хэтэрсэн эсэх

• Зээлийн үлдэгдэл болон төлөлтийн байдал
  зэрэг мэдээлэл багтдаг бөгөөд зээлдүүлэгч байгууллагууд таны зээлийн итгэлцэл, найдвартай байдлыг үнэлэхэд ашигладаг.